QSUT po zbrazet, 6 500 infermierë të larguar nga Shqipëria në 2 vite

0
6

Vala e largimit të bluzave të bardha drejtë vendeve të Bashkimit Europian nuk ka të ndaluar. Çdo vit nga Shqipëria largohen mesatarisht 150 mjekë të specialiteteve të ndryshme. Ndërkohë që rritje në numër po shënon eksodi i infermierëve. Sipas Urdhrit të Infermierëve gjatë 8 muajve të parë të këtij viti kanë aplikuar për tu punësuar jashtë mbi 800 infermierë. Edhe pse për Shoqatën e Infermierëve shifrat janë edhe më të frikshme.



Elson Jaçaj, president i shoqatës së infermierëve: Në dy vite janë 6 500 infermierë që kanë ikur. Nga Janari deri më tani shumica e të larguarve janë me eksperiencë pune…”

Jo vetëm vendet e Bashkimit Europian, por edhe Anglia, Shtetet e Bashkuara, Kanadaja, por edhe Vendet e Lindjes së Mesme po kërkojnë infermierë nga Shqipëria. Ndërkohë që Gjermania mbetet destinacioni i preferuar i shumë prej tyre. Madje pak ditë më parë ka ndodhur një rast i paprecedentë ku një spital gjerman, solli përfaqësuesit e saj në Qendrën spitalore Nënë Tereza. Të cilët kanë ‘joshur’ infermierët profesionistë.

“Përfaqësues të një spitali universitar në Gjermani vijnë dhe vendosin kontakte me vetë personelin, i cili punon në QSUT dhe poliklinika të tjera.”

Sipas kreut të Shoqatës së Infermierëve, jo vetëm QSUT, por edhe shumë ambulanca e spitale rajonale rrezikojnë të mbeten pa infermierë profesionistë. Për këtë situatë ai fajëson qeverinë.

“Vetë ata mund të jenë pas kësaj gjëje, sepse nuk e kuptoj se si një shtet mund të lejojë që në institucione shtetërore të vijnë të bëhen promocione të tilla.”

Edhe pse ka shumë Fakultete të Shkencave Mjekësore Teknike ku dalin çdo vit mbi 1 200 infermierë, largimet masive pritet të sjellin probleme në shërbimin shëndetësor.

Klan Plus